الموضوع ده متجرب 100 % ومظبوط تماما وعمرها ما خابت
ازاي تخلى بابا يوافق على كل طلباتك
طبعا ده يعتمد اساسا على طريقة العرض
مهما كان الطلب صدقيني النتيجة مضمونة
بس اهم حاجة اعملى باك جراوند كويس
يعني علاقتك ب بابا لازم تبقى حلوة من الاول ويكون عمادها الادب و الدلع
اي نعم لازم تتدلعى على بابا كويس جدا
ده مبدأ الباباهات بيحبو بناتهم علشان بيدلعو عليهم
طيب عندك طلب وحاسة انه واسع حبتين
ماتروحيش كدة خبط وتقوللي بابا انا عايزة مش عارفة ايه؟
لا الاول تعرضي الموضوع بحيادية تماما يعني كانه خبر في الجرنال
وبعدين تشوفي حد من اصحابك يكون بابا مقتنع بيه وتقوليلو مش فلان او فلانه عملت الموضوع ده
وفي اليومين اللي بعد كدة تشغلي mere exposure phenomenon
اعرضي الموضوع اكتر من مرة بطريقة جديدة وحساسة كل مرة يعني من غير زن ووجع دماغ
واختاري الاوقات اللي بابا يكون راااااااااااااااايق فيها
بعد اليومين تدخلى الخطوة التالتة والاخيرة ان شاء الله
تروحي لبابا كدة وهو قاعد رايق ومنعنش وتقومي رايحة المطبخ زي الشاطرة وتعمليله كباية عصير قهوة شاي حسب مزاجه
وتجيبهوله كدة وتتمحكي فيه كدة زي القطط وتقوليليو بالحرف الواحد اتفضل يا بابي با حبيبي
وتروحي قاعدة جنبه او حتي على رجله
وتقوليله بمنتهى الادب والدلع ممكن يابابا طلب؟؟
وتروحي طالبة منه الطلب اللي انتي بقالك اهو 4 ايام بتخططيله
غالبا بابا هايبصلك كدة ويضحك ويقوللك ماشي موافق
لو حصل ورفض وده مستبعد اوعي اوعي اوعي
3 اوعي تتنرفزي وتزربني وتضربي ستين بوز
لا اوعي كدة انت بوظتي كل حاجة وعمره ما هيوافق على طلبك ولو بعد 10 سنين
والموضوع هايتحول لعند في عند
لا انت تبصي كدة للارض بادب وتقوللي مش مشكلة يابابا على راحتك وتبوسيه كدة بزعل خفيف وتقومي تروحي اوضتك
طبعا بابا اصلا مندهش ومش مصدق ودانه من الادب الجم الللي انتي فيه
هايبدا يراجع موقفه ويقول لنفسه الموضوع مش وحش اوي
تيجي انت بقى تستمري في المعاملة المؤدبة معاه بس زي ما قلتلك كدة زعل محسوس تكلميه كويس جدا وكل حاجة بس بقمصة على خفيف كدة
يجي معاد الاكل تروحي انتي داخلة اوضتك وتقوليلهم ماليش نفس اكل
طبعا بابا بعد كل الادب اللي شايفة منك مش هايرضى يسيبك في الاوضة من غير اكل
هايجيلك ويقولك مالك يا بسبس مش عايزة تاكلي ليه؟؟
هاتقوليله معلش يابابا انا بجد نفسي مسدودة بس لو انت عايزني اطلع اكل معاكم مش مشكله هاكل ولو ماليش نفس علشانك يا بابا وتروحي باصاله كدة بحنان
واستمري على الوضع ده ادب ودلع وقال ايه نفسك بس مكسورة
وتخلي صاحبتك تكلمك في التليفون قال ايه بتسألك عن الموضوع اياه الطلب اياه
طبعا تتكلمي وبابا قاعد في نفس الاوضة
تقوللي لصاحبتك مش مشكلة بقى بابا مش موافق بس عادي
وتعملي نفسك قال ايه مدايقة وفي نفس الوقت الموضوع مش فارق معاكي علشان بابا هو اللي مش موافق يعني كلام بابا هايمشى عليك وانت فرحانة بيه( كلام فارغ يعني)
بس ولما تاقولك يا خسارة مش هاينفع تقوللي لا مش مشكله خيرها في غيرها
انا مش مدايقة ولا حاجة طبعا تقوللي الكلام ده والدمعة هاتفر من عينيكي وتخلصي المكالمة وتقومي داخلة عالسرير طوالي
صدقيني هم يومين ومقاومة بابا هاتنهار تماما وهتلاقيه هو اللي بيفتح الموضوع تاني معاك
ويعمل نفسة ال ايه بيناقشك فيه
اهم حاجة في المناقشة دي حاجتين
الاولانية الاستكانة التامة لكل اوامر بابا
التانية تحاولي تقنعيه كدة (من غير الموضوع ما يتحول لجدال) بالطلب بتاعك
النهاية هايوافق هايوافق ويقولك علشان خاطرك يا جميل انا موافق
طبعا ساعتها تديله بوس في المليان
وافتكري انتي كدة كسبتي ارض مع بابا
اوعي تخسريها
وحافظي على علاقتك دايما مثالية تحسبا لاي طلب تاني
الخميس سبتمبر 06, 2007 5:23 pm
